XV FESTA DA PISA DA CASTAÑA

Aldea con norte e sur

XV Festa da Pisa da Castaña

O narrador Celso Fernández Sanmartín será o pregoeiro desta edición e, como novidade,  haberá un concurso de pisado por parellas.

A localidade de Froxán, no corazón do Courel e declarada ben de interese cultural dende o 2006, acollerá o 7 de decembro a decimoquinta edición da Festa da Pisa da Castaña de Froxán. Esta exhibición etnográfica e gastronómica  promovida pola Asociación Fonte do Milagro é a primeira de Galicia que se organizou para recrear o sistema tradicional de conservación de castañas e atrae a numerosos visitantes de Galicia e de fóra aproveitando a ponte da constitución.

A pisa consiste en golpear repetidamente con forza e coordinación un saco pouco cheo de castañas contra un tallo grande de madeira co fin de quitarlle as cáscaras.  As castañas que se pisan pasaron antes polo proceso de secado ao calor e ao fume nos coñecidos sequeiros durante uns quince días e o traballo de “pisado” debe facerse entre dúas persoas. Rematada esta operación hai que baleirar o contido do saco nun bandoxo (bandexa de madeira aberta por un lado e con dúas asas) onde se sacudirá todo ao aire con moita mestría para separar a castaña xa pelada da cáscara. Daquela, a castaña seca estará lista para consumir ou para gardar na despensa.

PROGRAMA

12:00 Posta en funcionamento do sequeiro e explicación do proceso de secado da castaña.

12:30 Demostración de “pisado” e “abandoxado” a cargo de membros da Asociación Fonte do Milagro.

13:30 Pregón a cargo do coñecido narrador Celso Fernández Sanmartín.

14:00 Presentación do libro: “Oro en la Galicia interior, minería romana”  editado por GARHERVE.

14:15 Degustación do “Xantar do Pisador” (castaña seca cocida, chourizo, panceta cocida e sobremesa de castaña). O prezo é de 10 € e inclúe o sorteo dunha cesta de Nadal entre os que participen no xantar.

16:00 Retomarase o pisado e abandoxado no que como novidade este ano poderán participar as persoas que o desexen. Trátase dun concurso de pisadores por parellas. Un xurado de expertos na Pisa decidirá cal será a parella gañadora.

Durante toda a xornada haberá actuacións de música tradicional e postos de venda de produtos típicos da zona e de artesanía.

Dous espontáneos "pisando" as castañas